logoru
logo

Шымкенттіктер ХҚО мен автоХҚО-ға 10 күнде бір рет қана брон жасай алады

  • Бөлім:  Қоғам
  • Оқылды 77 рет

Енді халыққа қызмет көрсету орталығына кезекті брондау кезінде қызмет алушылар кезек алуға болатын бос уақытты көре алады, деп жазады KAZUS.KZ.

Бұрын бос орын жоқтығына қарамастан, брондау тізімінде барлық уақыт көрсетілетін. Бұл қызмет алушылар үшін қолайсыздық тудырып, мәзірден қайта шығып, бос уақытты қайтадан іздеуге тура келетін.

Шымкент қаласы бойынша "Азаматтарға арналған үкімет" мемлекеттік корпорациясының баспасөз хатшысы Алтынай Татаеваның айтуынша Egov.kz порталында кезекті қайта брондаудың жаңа функциясы іске қосылды. Егер азамат алдын ала жасаған броны бойынша қандайда себептермен ХҚО-ға бара алмаса, кезек уақытын қайта белгілеп, пайдаланбаған брон уақытын босата алады.

- Бір адамның бірнеше уақыт аралығын бірден брондау мүмкіндігі де шектелді. Енді азаматтар 10 күнде бір рет қана брон жасай алады. Бұл ретте, ХҚО мен автоХҚО-ға жасалған брон бөлек-бөлек есептелмейді, яғни қызмет алушы 10 күн ішінде ХҚО-ға да, мамандандырылған ХҚО-ға да кезекті онлайн қоя алады - деді Алтынай Татаева.

АвтоХҚО-ға жүгінуші азаматтарға көлікті қайта тіркету қызметі қажет болса, брон көлікті сатушы азаматтың атында болу керектігін ескертеміз.

Аталған шаралар брондау сервисіндегі кезекті азайтуға және неғұрлым көп азаматтың қызмет алуына жағдай жасады.

Аталмыш өзгертулерді «Азаматтарға арналған үкімет» мемлекеттік корпорациясының бастамасымен egov.kz порталының операторы – «Ұлттық ақпараттық технологиялар» АҚ жүзеге асырды. Бұған Азаматтарға арналған үкіметке қызмет алушылардан келіп түскен өтініштердің анализі мен онлайн түрде кезекке тұруды техникалық жақсарту қажеттілігін анықтаған фокус-топтың тестілеу нәтижелері негіз болды.
Сондай-ақ бір жұмыс күні ішінде бір ЖСН иесі үшін қызметтердің екі түрін брондау мүмкіндігі жасалды, олардың бірі құжаттандыру қызметімен байланысты. Мысалы, егер бұрын азамат бір күнде бір ғана қызмет түріне брон жасай алса, мәселен, жеке куәлік қызметі бойынша, енді сол күні одан өзге қызмет түрін алу мүмкіндігі бар.

Сонымен қатар, енді egov.kz қолданушылары электрондық үкімет порталындағы жеке кабинетінде тапсырыс берілген кезегінің мәртебесін көре алады.

Естеріңізге сала кетейік, Шымкент қаласының Халыққа қызмет көрсету орталықтары қысқартылған кесте бойынша сағат 9.00 - ден 14.00-ге дейін жұмыс істейді. Сонымен қатар халыққа қызмет көрсету орталығына бару үшін кезек уақытын алдын ала брондау қажет. Осы бағытта азаматтардың денсаулығын сақтау үшін порталда электрондық өтініш беру арқылы «қағаз» жүзінде көрсетілетін әлеуметтік қамсыздандыру саласындағы қызметтерді eGov порталындағы «Электронды өтініш» сервисі арқылы қашықтан беру мүмкіндігін қарастырылған.